ماذا فعلت في الأربع وعشرون ساعة المنصرمة <<متعوب عليها الكلمة

[عندما]

السلام عليكم

وشلونكم طيبين ......... بشوف وجهه نظركم وآراكم حول هذا الموضوع ..

شوفو وشلون توزيع بعض الناس لساعات يومة ..... وين أعضاء منظمة جائزة نوبل عنه يصفقونه بوحده في مجال الإدارة على هالترتيب المميز :D

8ساعات دوام أو دراسة <<<وياليته يداوم زي الناس ....والا الدراسه مهوب عاقل الفلسطيني الدافور كل درجاته إمتياز
10 ساعات نوم جعل رويسه الفتق :d6u: .....حشى والله لوهالنوم يواجر عليه مواجر تسان زد أغتثت تسبده من القروش :ci: .....<<<طبعا الصلوات معشقها بالخامس ومن دون كلتش الله لا يبلانا :( ....

4ساعات دوران وموذين خلق الله .......هذا أن تسانه راعي دوران ..... وإذا كان برستيجه عالي وكبر على الحركات هذي <<<بالعربي جوال الدمعه ممتلي أرقام بنات ماعاد الا بيطشر ..... وشهوله دوران
تلقاه زابن في إستراحة والا في ملحق واحدن من أخوياه وهاتك يا بلوت و :12: حش في خلق الله ..... ويحلفون حجارة ريموت الريسيفر كل يوم مغيره <<صايرتن ملابس داخلية مهيب حجارة ...

كم بقى من ساعه للي متابع معي الا الحين .....بقى ساعتين ........طبعا هذي من أثمن الساعتين في يومه المليء بالأشغال :02: ...... وتستغل في الرضع من التلفون لمكالمة الصاحبة :r56: <<<الرضع هذا مصطلح مأخوذ من البزران الصغار لأنهم يرضعون من الرضاعه ...أما شباب اليوم يرضعون من التلفون ((والله ياعليكم مصطلحات من تالي مدري وش تبي ))

وبكذا خلصت ساعات اليوم ......وبعضهم ماتكفية وده أن اليوم 30 ساعه

والله الهرج عندي وازدوازد بس مانبي نخلي الموضوع ممل ونبي نشوف ردودكم يا أعضاء المنتدى .........

صح أني كاتب الموضوع ومركز على التماسيح بس دوركم جاي في الطريق يالبطات :D

[**جلابص**]

للأسف هذا الي حاصل ويمكن الجدول الي حطيته على سوئه الا انه يهون عند جداول شريحه آخرى كبيره من الشباب والي يتخللها شرب العرق الوطني والتحشيش وضرب الأبر وسرقة السيارات والتفحيط والهجوله والخطف و و و و و الدنيا يا ابو عتن هاليومين قسم بالله تخوف وتسمع أشياء وتشوف أشياء تخليك تصقع رأسك بتشوف انت في حلم والا في علم والبلاء انه اول الدشير كانوا هم عيال الناس الي آي كلام الحين كبار الدشير واغلبهم هم عيال الحمايل والقبايل وصاروا لا يستحون ولا ينتخون

ما نقول الا لا حول ولا قوة الا بالله

والله يهدي شبابنا لما فيه الخير لهم ولأمتهم

واذا تبي الصدق قسم بالله عندنا شباب فيهم طاقات كبيره وعندهم فن وأبداع بس ما حصلوا احد يصقل مواهبهم ولا حصلوا الفرصه وهنا يكمن سر مشاكل الشباب الحاليه...

يا أخي بضرب لك مثال بسيط

التطعيس انا رحت بعد العيد الى ام دباب في القصيم طعس مشهور يجتمع فيه لا يقل عن خمس الآف شاب وكلهم هواة تطعيس وتلقى سياراتهم ملفقه وبعضهم تلفيق آي كلام ولا يعرفون لا حزام آمان ولا طفايات حريق والطعس ملعوب فيه ولا فيه آرسال جوال والبقاله ومحطة البنزين لازم تضرب لها مشوار ما يقل عن خمسه وعشرين كيلوا وبر بعد وآخرتها سمعنا انه في واحد جاء وجلس يحرث ويبغى يزرع تحت الطعس في المكان الي يشدون منه العزم ؟؟؟؟؟؟؟؟؟!!!!!!!!!!!

في الجهه المقابله ومهوب في أمريكا والدول المتقدمه...لا

في الأمارات في مسابقات منظمه في الطعوس حضروها الشباب وانهبلوا من التنظيم

يحلفون ويقسمون انه في هنود منثورين على الطعس عشان كل ما خلص واحد محاولته جلسوا يواسون الطعس عشان يرجع زي ما كان

ودوريات على أطراف الطعس وتنظم السير والجمهور مطاعم متنقله ومن الماركات العالميه

سيارات اسعاف ومطافي في موقع الحدث ومستعده في آي لحظه للتدخل

أجانب حاظرين يتفرجون من مختلف الدول الغربيه

السيارات المشاركه مرقمه ومهيأه بكل وسائل السلامه

جوائز نقديه الآف مؤلفه

وغيره وغيره وغيره

ولو تناظر لها تراها امور رمزيه وما تكلف ولا تتعب ومع ذلك تعني الشيء الكثير للشباب فليش حنا ما نشوف اهتمام في الشباب واهتماماتهم؟؟؟

صدقني لو فيه اهتمام في الشباب ما شفت شبابنا يهيمون من موضه لموضه ومن خراب لخراب جديد وأغلب شبابنا ضايع ولا يدري وش هدفه بالحياة وتلقى ما عنده لا هوايات ولا اهتمامات ولا طموح ولا احلام ولا شيء ولو تقوله وش امنيتك قالك شاليه وبنت وكأس !!!!

[عسل]

الله الله

موضوع رهيب وتحس انه حق حش هع هع


بس الحين ذابحني النوم

ابرجع لكم بكره واطلع كل اللي بخاطري


بس حبيت ارد واحجز لي مكان باول الصف خخخخخخ


برب

[*عازف شجن*]

اخوي موضوعك قيم ورائع ومهم
الله يعطيك الف عافيه على طرحك واختيارك للموضوع



أما من ناحية الاستفاده من الوقت فالله المستعان كلنا مقصرين وانا اولكم

ونسأل الله العافيه

سهر وقهر وماحولك احد هذا حالي وحال الكثير الله يتوب علينا جميع

ولو علمنا ان الشخص يقدر في اقل من دقيقه يجمع الكثير من الحسنات لكان حالنا افضل ولكن ضعفت همم الخلق ولاحول ولاقوة الا بالله.

تقدر في اقل من دقيقه تذكر الله فيها , وكذلك قولك سبحان الله وبحدمه مائة مره , والحمد لله .... الخ
نسأل الله الهدايه والثبات لنا جميعاً ,,,,,,,,

وتقبل خالص تحياتي وتقديري ,,,,,,,,,,,,


أخوكـ : عازفـ شجــن ........................ـأ

[ناااايف]

وعليكم السلام ورحمة الله وبركاته

يعطيك العافيه عندما على طرح الموضوع


نعمتان محسود عليهما كثير من الناس :

الصحة والفراغ


الفراغ هذا ذابح النااس وهم الي يجيبونه لانفسهم

حتى بالرياضيات ذابحنا هالفراغ اكمل الفراغ التالي بالعدد المناسب

أكيد مو كل الايام بيكون عندك فيها فراغ كثير

وخاصة اذا كنت عند أهلك يروح وقت الفراغ بالاشغال السنعه

يرسلونك تجيب خبز وطبق بيض واغراض للبيت ;d5:

اما العزوبي الي ساكن بشقه وبعيد عن ديرته ياكثر وقت فراغه :kr:

انا سلمك الله كل وقتي فراغ في فراغ يبيله تعبيه هالفراغ بشي مفيد

بس كيف والله لو لا الله ثم النت والا كان تلقاني ادوج بالشوارع

حتى الايام هذي ماعندي دوام ابي الدوام يجي عشان اقدر انظم وقتي

لانه صاير مخربط علي الحين والله معرف الليل من النهار كلها عندي مثل بعض

اكثر وقتي على الجهاز من 9 الصباح الى الظهر هذي مغطه وحده

اريح وقت الغداء بس وارجع اكمل الين بعد العصر

اطلع بعد العصر من النت واخذ صكه بلايستيشن مع الشباب

وسوالف وتقطيع في خلق الله .

ارجع ادخل النت من بعد العشاء الين 12 بالليل وراجع انام

هذي اكثر الايام عندي كذا

لكن ان شاءالله اقدر اغيرها اذا داومت واسوي لي جدول امشي عليه


مشكوووووووووور ويعطيك الف عافيه عندماا




نااااااااااااايف

[عندما]

الأخ جلابص: لا حول ولا قوة الى بالله ...... وفعلا نقص الإهتمام بالأنشطة الشبابية وإستغلال وقت فراغهم في شيء مفيد من الأسباب الرئيسية .....وفعلا زي ماقلت فيه طاقات عجيبة في شباب اليوم وإن شالله فيهم الخير الكثير بس لازم إيجاد حلول لصقلها في المجالات المفيدة.... وشاكر لك زيارتك ووجه نظرك وردك ....

الأخت عسل: طيب نحتريتس ....

الأخ عازف شجن:جزاك الله الف خير على التذكير وجعله الله في ميزان حسناتك ..... والله يهدينا ونصحو من غفلتنا ..... فعلا الجميع مقصر ومخطيء ..... شاكر لك زيارت متصفحي وإضفاء لمساتك الجميلة فية....

الأخ نايف: الشكر لك ياعزيزي على مشاركتك معنا ردك ..... وأنت قمت بوصف حالتك ووضعك الحالي ..... وأحيي فيك إنتباهك وفهمك لوضعك ومحاولة تعديله وتغييرة .... وأسأل الله لنا ولك التوفيق لما يحبة ويرضاه ..... بس خل عنك صراحة على حسب كلامك عزالله انك مبشك في النت دايم ....يبيلك تخفف والا عيونك بتطلع من محاجرهن ...... وشكرا مره أخرى على الزيارة

[الجوهرة]

الله يكفينا شر شرشحتك يابو عتن

اقول خل البطات بحالهم وشوف لكم حلول يالتماسيح باوقاتكم ههههههه


بصراحه موضوعك مهم جدا الله يعطيك العافيه

ويستحق النقاش وايجاد الحلول للطرفين اناث وذكور

وانا ارجع اسباب عدم استغلال الوقت الاستغلال الصحيح للعيشه

اللي احنا عايشينها ولله الحمد يعني بصراحه حنا مرفهين في كل

شي وما عندنا احساس بالوقت وقيمته الا يمكن وقت السفر

مع انهم قاموا يخورونها بالمواعيد هالايام بس ربك يعين:)


شي ثاني مافيه اماكن مهيئه يقضي فيها الشخص وقت فراغه

بشي نافع ولا حتى تلاقي ناس مهتمين باوقاتهم عشان تقتدي

فيهم والا تصاحبهم الا فيما ندر


بصراحه يبيلنا اعادة تاهيل من اول وجديد في معرفة اهمية الوقت

وايش نقدر نسوي من اشياء راح ترجع علينا بالنفع والفايده من خلاله

هذا اللي عندي وقلته بس حلول ماعندي< وش فايدتك اجل:D


تسلم عندما على هالطرح .. لا تحرمنا تواجدك





الجوهرة

[عندما]

الأخت الجوهره: فعلا نمط العيش المترف وطريقته لها تأثير كبير....وأيضا عدم توفر الأماكن المناسبة وتنوعها تسبب بيئة خصبة للفراغ ..... وعلى قولتك لازم تأسيس من أول وجديد في مجال فهمنا للوقت<<<اللي يبي إستمارة تأسيس يجيب ورقه من أمهات ميةو نطبع له وحده :D يا شين السماجه

وشاكر لك تواجدك الملحوظ في متصفحي ....