قصيدة -=-^(العب غيرهاا)^-=-

[*عازف شجن*]

اقبل بلهفه وقال : ودي اضمك
واحب راسك لين تنسى خطاي
قلت : من هو انت ذكرني باسمك
انا ما أعرفك وشلون تطلب رضاي
قال : أكيد تمزح ياخف دمك
أنا حبيبك ناظر وش حلاي
قلت : يازين أحلفك بالله واذممك
حاول تذكرني تراني صرت نساي
قال : تتغلى أعرفك زين وافهمك
لكن وراك لين تمشي معاي
أدري تحبني وبغيابي زاد همك
ولولا المحبه ماقلت تعال وياي
قلت : صدقني حاولت ومابان رسمك
أرحل بعيد ولاتفكر تتبع خطاي
دامك غبت أجل غاب قسمك
ودامك تبيع الهوى مانيب شراي
قال : معقول ماعاد صرت اهمك
وانت الذي كنت تناديني قمراي
قلت : كنت ورده أفرح بشمك
وذبلت الورده يوم ماحصلت ماي
قال : انس الماضي مادمت يمك
وهذي يميني لك عهد بدنياي
وذي شفتي بس قرب فمك
ذوق صافي عسلها يا داي ودواي
قلت ابعد هناك في شفتك سمك
ماعاد ابيك ولا انت البدر بسماي
عافتك نفسي دور من يلمك
يمكن تعجب غيري وهذا مناي
تعرف قدر قيمتي ويزيد همك
وتنزف جروحك مثل ما سالت دماي
والعب غيرها لعن ابو من رحمك
وحب(ن) مضى واندفن ما عاده بجاي
وروح ياشاطر تأخرت على امك
اللحين تدورك تقول : وينه ضناي.




ولكم حبي وتقديري ,,,,,,,,,,


أخوكمـ : عازفـــ شجـــن ..........ـأ

[ناااايف]

صح لسااااانك عاازف شجن

كلمات جميله

استطعت ان تكتبها بطريقه سهله وجميله

ننتظر ابداعاتك القادمه

شكرا لك


ناااايف

[*عازف شجن*]

اخوي نايف مشكورر على مرورك الكريم

وصدقني احلى مافي القصيده مرورك وردك الاجمل

تدري القصيده لها كم يوم وانت اول واحد تسير علينا

لاهنت اخوي والله يعطيك العافيه على حضورك المستمر


لك حبي وتقديري ,,,,,,


أخوكـ : عازفــ شجــن ................ـأ

[الجوهرة]

صح لساااانك عازف


وروح ياشاطـر تـأخـرت عـلـى امــك
اللحين تدورك تقـول : وينـه ضنـاي

^
ههههههههههههه ضحكني هالبيت فيه عزة نفس بتريقه :)


كلمات قويه ومشـاعر عــملاقه00 ترتقي ثم تــرتقي بكل حب وكبرياء



لاعدمنا تدفق احساسك وشعرك ..دمت بود.


الجوهرة

[نـــدى]

عازف شجن

كلمات رائعه..
وسطور تحمل بطياتها
الف معنى ومعنى..
فلا تبخل علينا بما يجود به قلمك المذهب

تحيتي لك

[*عازف شجن*]

مشكورهـ اختي الجوهرهـ على مرورك الكريم

وتشريفك للقصيده المتواضعه.

اما من ناحية عزة نفس الا عزة نفس بقوه من شي شفته وعانيته.

ومثلك عارفه الشعر الصادق مايجي الا من معاناه.

هي باختصار قصيده تعبر عن كبرياء مجروح.

ودمتي لنا نبراس يضيء المنتدى ,,,,,


اخوكـ عازفـــ ............ـأ

[*عازف شجن*]

هلا وغلا ندوش

نورت القصيده بمرورك عليها


<<اعجبته صورتك الجديده :)

الله يعطيك العافيه على نشاطك ومشاركتك ,,


اخوكـ : عازفــ ...............ـأ

[طــحــنــون]

تسلم الايادي اخوي على هالكلمات الرائعه
وبصراحه يعجبني القصيد السهل الممتنع

مع تمنياتي لك بالتوفيق

ولاتحرمنا من جديدك يالغالي

[*عازف شجن*]

هلا وغلا اخوي طحنون

والحمد لله ان القصيده اعجبتك

ولاهنت على مرورك الغالي

تقبل تحياتي ,,,,,,,,,

أخوكـ : عازفــ ...........ـأ

[بحر الشوق]

في الحقيقه احب اقول اخوي عازف شجن مع احترامي ولابد إنك تتقبل النقد وهذا يدل على تفهم الشاعر في تقبل النقد هاذا اذا كنت انت شاعر مانقلتها من احد المجلات او الصحف او احدى المنتديات الاخرى مثل الذين يتزعمون الشعر وكلها مسروقه من احد الجهات التي ذكرتها قبل قليل 0
حيث اني حزين لمثل هاؤلاء وايضا حزين على الكاتب الاصلي للقصيده في المجله او الصحيفه او المنتديات حيث ان حقه مهضوم في الاحتفاظ بحقه من القصيده من السرقات وغيرها مثل ماهو حاصل الان في قصيدك اخوي حيث ان القصيده قراتها من قبل وهي تخص شاعر كبير جدا في نظري ولو لم يكن كبير عند غيري من الصحفين او مجالس الثقافه أو مؤلفين الدواوين الكبيره على قولهم لانها كلها اما اتت بواسطه مسؤل او بواسطه حسابه في البنك
واخيرا لا احب ان اطيل عليك
إنما اقول إن القصيده اكثر من رائعه لاكن الاروع منها هو قائلها وبالطبع لست انت انما هو من اعرفه انا وعندي الإثبات الكبير لكلامي هذا
حيث انها من قصائد اعز اصدقائي ويدعى ابو خالد 0
وكما قلت ارجو عدم الزعل فكل كلامي هذا انما هو نقد
ودمتم سالمين 000000000000
اخوكم
بحررررررر

[*عازف شجن*]

ههههههههههههههههههههههههههههههههههههههههههااي

هلا وغلا بحر الشوق

يعني تبي توصل معلومه للجميع اني ابو خالد :5tg:

طيب ابشر ولاتزعل من بكرره بغير عازف الى ابو خالد

الا على فكره ترى عندك اكثر من غلط بالاملاء :)

تدري بحر الشرهه مو عليك على الي دلك على المنتدى

قلت يمكن تضبط اخلاقك بالعمل بس مافيه امل

ما اقول الا : .........فلما اشد ساعده رماني :eek:

اما بالنسبه للقصيده ترى وربي اللحين يصدقون ان فيه شاعر وراعي مجلات اسمه ابو خالد الله ياخذ ابليسك ما يدرون ان ابو خالد هو الي قاعد يناظر خشتك اللحين بالعمل :D


اقول بحر لايكثر انتبه لعملك ومسموح من المشاركات


ايه قبل لا أنسى ترى الفطور فيك بكرره :bnm:


عموما مشكور على التشجيع هذا يابو عبدالله :rolleyes:


وتقبل تحياتي المباشره من المكتب الى المكتب :losd:


عازفـــ ......................ـأ

[نبض القصيد]

اقبـل بلهـفـه وقــال : ودي اضـمـك
واحـب راسـك ليـن تنـسـى خـطـاي
قلت : مـن هـو انـت ذكرنـي باسمـك
انا ما أعرفك وشلون تطلـب رضـاي
قــال : أكـيـد تـمـزح يـاخـف دمــك
أنــا حبـيـبـك نـاظــر وش حـــلاي


ياسلاااااام ياااعاااازف شجن
كلماتك جمييييييييله
اصفق لك وبحراره


ماننحرم
والى الامام
اختك
نبض القصيد