المساعد الشخصي الرقمي

مشاهدة النسخة كاملة : ماذنبه أنه سعودي ؟!!!

أهديته قلبي
31 Aug 2005, 07:25 AM
السلام عليكم ورحمة الله وبركاته

المشهد الأول

** ماشاء الله يا ابوصالح مبروك السيارة الجديدة
الله يبارك فيك يالغالي والله توني مغسلها وملصق عليها ستيكر .. ليموزين(( تاكسي )) ابترزق الله من وراها الشكوى لله شهادتي الجامعية ما فادتني
** ما شاء الله .. الله يرزقك أكثر وأكثر ويفتح لك ابواب رزقك ...!!

..
..
..
..
..
..
..
..
..
المشهد الثاني

** وش رايك يا أم محمد نروح للسوق
والله انها زينه بس دحيّم نايم ولا هوب طايع يودينا
** نروح نوقف لنا أقرب ليموزين أكثر ما كثر الله التكاسي بالرياض ..
والله انك صادقة ..

..
..
..
..
..
..
..
..
..
المشهد الثالث
يامحمد ودي سوق الأندلس معلوم انتا او ما فية معلوم
** معلوووووم
يامحمد اصبر خل بنمر خويتنا ام عبيّد ..!!
ابشري ياخالة .

يووووووووووووه
اثره سعودي يا أم محمد
واخزياااااااااااه
ممكن لو سمحت نزلنا هنا بس عند البقالة هذي ... هونّا مانبي نروح للسوق ..
** ابشري ياخالة

ام محمد وخويتها .. يدورون لهم ليموزين عند البقالة ومن أهم الشروط يكون (( هندي ))
..
..
..
..
..
..
..
..

المشهد الرابع

الخطوط الجوية العربية السعودية تعلن عن وصول رحلتها القادمة من جدة ..!! ويوسف على متن هذه الطائرة

نزل طال عمره ..!!

هلا بالطيب تبي تاكسي ..؟؟
** لا مشكور فيه واحد من ربعي ينتظرني
يارجال تعال بعشرين ريال بس
** لا الله لا يهينك فيه واحد من الشباب ينتظرني

يوسف .. محمد فيه ليموزين
العامل .. ايوه
بكم ودي حي الروضة
العامل .. بخمسين ريال
يوسف يالله مشينا ..!!!

سائق التاكسي السعودي ... قول ما أبيك ياخوي أحسن ..!!


المشهد الاخير

وراك يا ابوصالح بتيبع الليموزين
والله يا ابن الحلال ما لقيت أحد يركب معي .. وان ركب قال نزلني قبل ما أوصلة مشوارة ..!!


..
..
..
..
..
..
..
..


انتهى


حقيقة
92% من سائقين الليموزينات .. أجانب !!

حقيقةً أخرى
98% من الشعب يفضل الركوب مع الأجني على السعودي ..!!



أمر محزن حقيقةً


ترى ما هو السبب ..
هل نحن .. ام سائقين الليموزينات ..!!

وما الذي يقدمونه السائقين الأجانب على السعودين ..؟؟

ترى هل نساهم نحن بشكل مباشر في زيادة نسبة البطالة في الوطن ..؟؟

نطالب تشغيل المواطن .. ونسن اقلامنا ونهجو ونكتب ... ونحن من أكبر المتعاونين في اضعاف عزيمة المواطن العامل ..

نطالب ونطالب بالتوظيف .. ولكن بدون علمنا نحن من يشارك في البطالة ..!!
في كل مجلس من مجالسنا ليس لنا حديث الا البطالة ونحن من اشد المساهمين فيها بالرغم من أننا لسنا مسؤلين او شيء من القبيل ..

اذاً ...لـــــ نتعاون ..

سؤال يدور في خاطري كثيراً ..؟؟

لماذا يفضلن النساء الركوب مع الأجنبي على السعودي ؟؟

هل الرجل والاجني خارج نطاق الرجولة ام ماذا ...؟؟
امر محزن


هو نفس السؤال للشباب

لماذا تخشى من ركوبك مع السعودي وتفضل الأجنبي ... ما المشكلة في السعودي اجيبوني ..؟؟

منقول

تحيتي .
بنوته
31 Aug 2005, 07:58 AM
وعليكم السلام اختي اهديته قلبي

اول شي انا اصلا ماعمري ركبت ليموزين
في حياتي
ولو يدري ابوي اني ركبت سواء هندي والا سعودي
بيحش رجليني حش:losd:

(لماذا يفضلن النساء الركوب مع الأجنبي على السعودي ؟؟)
المتعارف عليه في مجتمعنا
ان اي شاب سعودي مغزلجي<<<<<<<< ما اقصدكم انتم يالتماسيح
انتم غير واثقين فيكم
والحريم يخافن لايغازلهن راعي التاكسي
مع ان السائق الاجنبي بلاه اعظم

هذا رايي وياليت يتقبلونه التماسيح
بصدر رحب..
ومشكوره اختي اهديته عالموضوع..

بنوووووووووووووووووته..
حموودي العتيبي
31 Aug 2005, 08:07 AM
يا هلا وغلا بأهديته

وهلا بمواضيعها

اللي كل موضوع يطلع لنا أحلى من اللي قبله

يعطيك العاافية على هالموضووع

اللي فعلا نعاايشه ونعيش واقعه

السعووودي يتسلتح في الشواااارع

وياليته يحصل اللي يكفي بانزين سيااارته

اما الاجنبي

ويح قلبي بس

اذا نزل ركااااب

الا ركااب غيرهم في انتظاااره

وشغال احسن شغله

والنساااء وما ادرااك مالنساااء

تأمن الاجنبي أكثر من السعوودي

ليييييييييييه؟؟

لانها تااخذ راحتها معه تسووولف هي واللي معها كأنهن جالسات بالبيت

والا مسكت الجواال وجلست تقرق

اما مع السعوودي فلا والف لااا

عييييييييب

يقطّعها الحيااء ماتقدر تاخذ راحتها مثل ماهي اخذتها مع الاجنبي

ولا تملك الجرأة اللي تجيها مع الاجنبي مع السعوودي

اما بالنسبة للشباب

انا ما أرى ان فيه احد يفضل الركووب مع الاجنبي على السعوودي

واذا في احد وشو له يفضل الاجنبي على السعوودي؟؟؟

حيااااااااء <-=-=- اذن مفارقتك الرجوولة ووش خليت للحررررريم

وش السبب؟؟؟؟

ويح قلبي بس

نطالب تشغيل المواطن .. ونسن اقلامنا ونهجو ونكتب ... ونحن من أكبر المتعاونين في اضعاف عزيمة المواطن العامل ..

نطالب ونطالب بالتوظيف .. ولكن بدون علمنا نحن من يشارك في البطالة ..!!
في كل مجلس من مجالسنا ليس لنا حديث الا البطالة ونحن من اشد المساهمين فيها بالرغم من أننا لسنا مسؤلين او شيء من القبيل ..

ويح قلبي بس

الله يديم عز الدين

ويديم عز الحكوومة علينا

ويعطيك الف عااافية يا اهديته

ولا تحرمينا من ابدااعاتك

ولك تحيتي

محمد العتيبي
بنت الاجواد
31 Aug 2005, 11:19 AM
اول شي انا اصلا ماعمري ركبت ليموزين
في حياتي
ولو يدري ابوي اني ركبت سواء هندي والا سعودي
بيحش رجليني حش <<<انا مثل بنوووتة بهالنقطه هذي

بس برائي انا لو حصل واضطريت اركب مع تاكسي فانا افضل السعودي اكثر
لانه وبيخاف علي مثل مايخاف على اخواته صحيح مو الكل اخلاق بس لمااحترمه واتعامل معه باحترام واكون محتشمه بلبسي وبعباتي اكيد راح يحترمني ويحرص على سلامتي اما الاجنبي ماراح يهمه لاانا ولا غيري صح او لا

هذه وجهة نظري اتمنى ان تتقبلوها

مشرفتنا الغاليه

موضوع مهم ويحصل بكثره في مجتمعنا
اشكر لك حسن اختيارك


بنت الاجواد..
مهاوي الشرقيه
31 Aug 2005, 05:24 PM
هلا وغلا فيتس اهديته قلبي
اول شي اهنيك على روعة اختيارتس للمواضيع ونقلها لنا

ثانيا انا قريت الموضوع وفوق هذا قريت الردود
ولكن لين الحين ما اقتنعت باي من وجهات النظر

لماذا تخشى من ركوبك مع السعودي وتفضل الأجنبي ... ما المشكلة في السعودي اجيبوني ..؟؟

انا باعتقادي واللي صاير الحين ان الشاب السعودي او الخليجي بوجهة نظر اعم
بيده خرب على نفسه هاذي للاغلبيه الشر يعم والخير يخص
السبب::::
ماترك له انطباع او شخصيه محببه
بل ترك شخصيه غر محببه ومكروهه
الكل عارف ليش
من المصايب اللي تصير من خطف في التكاسي<<< عد واغلط
ولو نرجع لسببها نلقى وراها ياسعودي ياخليجي

من هذي النقطه بدا يعج الخوف في نفوس الكل
ومن خاف سلم

وفوق هذا انعدم الامان في هذا المنطلق

تقبلي وجهة نظري
لكي مني ارق واعذب تحيه
الحمـ بنت ـايل
31 Aug 2005, 06:39 PM
بسم الله الرحمن الرحيم

شكرا اختي اهديته قلبي على موضوعك الجميل ماادري يهمكم راي اولا بس بقوله بكل

الاحواال انا من اللي تستخدم الليموزين بكثره وماعندي فرق بين هنديا وسعوودي

المهم اللي بقوله انه صار معي موقف مره مع احد الليموزينات كنت رايحه للسووق مع

زميلتي وبالعاده لمااركب لموزين مع اهلي مانتكلم ابد بالليموزين او نسوولف بس اول

ماركبت زميلتي معي من اول ماركبنا الين وصلنا السووق وهي تسولف وانا ساكته

ماارد عليها ولا كلمه وكلش الليموزين يرد المهم اللي ابي اقووله اذافتحتي مجال

لليموزين سواء سعودي او اجنبي ماراح تلاقين احترام منه لانه بيدخل بتفكيره انك

انتي مو محترمه وتبين السوالف وحنا مانبي نقطع رزق احد وابي ادي نصيحه لاخواني

اصحاب الليموزين يحافظ على نفسه ولا يتدخل في شي مايعنيه ويحترم اللي راكب

معه عشان الراكب يحترمه وانشالله يرزقهم ربي ويوفقهم وشكرا .........

اختكم .. الحمـــ بنت ـــايل .....
أهديته قلبي
31 Aug 2005, 06:41 PM
هلا وغلا فيكم جميعاً وبوجهات نظركم

وسأخذ بعض النقاط من بعض الردود للتعليق عليها .

المتعارف عليه في مجتمعنا
ان اي شاب سعودي مغزلجي << بنوته

ربما يكون هذا أحد الأسباب ولكنه ليس الأصل في نظري .

[line]

لانها تااخذ راحتها معه تسووولف هي واللي معها كأنهن جالسات بالبيت

والا مسكت الجواال وجلست تقرق

اما مع السعوودي فلا والف لااا << حمودي

هههههههههههههههههههههههه يعني عشان السوالف

ما أتوقع هالنقطة وليس القصد السوالف ولو نرى فإنهن يبحثن عن تاكسي اجنبي او سعودي شايب فإذا مااستحوا مع الهندي بيستحون مع الشايب على الأقل .

[line]

بس برائي انا لو حصل واضطريت اركب مع تاكسي فانا افضل السعودي اكثر
لانه وبيخاف علي مثل مايخاف على اخواته صحيح مو الكل اخلاق بس لمااحترمه واتعامل معه باحترام واكون محتشمه بلبسي وبعباتي اكيد راح يحترمني ويحرص على سلامتي اما الاجنبي ماراح يهمه لاانا ولا غيري صح او لا << بنت الأجواد

هذا مانتمناه ونرجوه ولكنهم رسموا لأنفسهم صورة مخالفة لذلك .

[line]

انا باعتقادي واللي صاير الحين ان الشاب السعودي او الخليجي بوجهة نظر اعم
بيده خرب على نفسه هاذي للاغلبيه الشر يعم والخير يخص << مهاوي

في اعتقادي أن رأيكي هو أكثر الآراء قرباً من الواقع ، ومن خاف سلم .

بالفعل فإننا نخشى من الركوب مع السعودي خوفاً منه لم قد يحصل منه من خطف أوغيره فهو في وطنه وبلده وبين أهله بعكس الهندي الذي قبل ان يفعل اي شي يحسب لذلك ألف حساب من غربته وسبب هذه الغربة وأهله الذين ينتظرووونه فلذلك خوفا من الشاب السعودي يتجهون للأجانب أو الشايب السعودي ويفضلونهم على الشباب .

[line]

بنت الحمايل بكل تأكيد رأيك يهمني ويسعدني مشاركتك وصدقتي في أننا من نجعل الآخرين يحترموننا أو لا ولكن الأسباب أبعد من قضية السوالف ويهمنا ابن بلدنا على غيره ونحترمه ونقدره لأنه عمل واجتهد لكي يعيش ويسرنا أن نقدم له العون ولكن هو من أساء لنفسه بتصرفاته وإن كان قد صدر من القلة ولكن الشر يعم .

[line]

ألف شكر للجميع مشاركاتهم وطرح وجهات نظرهم ، وتذكروا أن الإختلاف لايفسد للود قضية والإختلاف رحمة ، وليس المهم اتفاق الآراء بقدر ماهو مهم أن يطرح كلٌ رأيه الشخصي .

تحيتي وشكري وتقديري للجميع لمشاركتهم .
ناااايف
31 Aug 2005, 10:55 PM
وعليكم السلام ورحمة الله وبركاته


يعطيك العافيه اهديته قلبي على طرح الموضوع


هذي القضيه صارت تقريباً حديث اهل الليموزينات السعوديين


انا بعطيكم وجهة نظري حسب مااشوفه الايام هذي وببداء بالمشهد الرابع


المشهد الرابع

الخطوط الجوية العربية السعودية تعلن عن وصول رحلتها القادمة من جدة ..!! ويوسف على متن هذه الطائرة

نزل طال عمره ..!!

هلا بالطيب تبي تاكسي ..؟؟
** لا مشكور فيه واحد من ربعي ينتظرني
يارجال تعال بعشرين ريال بس
** لا الله لا يهينك فيه واحد من الشباب ينتظرني

يوسف .. محمد فيه ليموزين
العامل .. ايوه
بكم ودي حي الروضة
العامل .. بخمسين ريال
يوسف يالله مشينا ..!!!

اذا كان فيه شاب سعودي بيسوي الحركه هذي


حرام عليه يحمل اسم سعودي وهو يشوف ابن بلده يدور رزقه


ويروح يعطيه الاجنبي ..


انا اكثر من عشرين مره انزل للمطار بالرياض


والله العظيم مااشوف عند بوابة الخروج الا سواقين سعوديين


فيه هنود بس قليل .. واشوف الشخص السعودي الي احسه محتاج


واركب معه ..لانه حرام اعطي هندي خمسين ريال والسعودي محتاج لها اكثر



98% من الشعب يفضل الركوب مع الأجني على السعودي ..!!


مااتوقع ان الاغلبيه يركبون مع هنود .. الحين الناس فتحوا


وصارا يفضلون السعودي على غيره .. وخاصه الشباب..



سؤال يدور في خاطري كثيراً ..؟؟

لماذا يفضلن النساء الركوب مع الأجنبي على السعودي ؟؟

هل الرجل والاجني خارج نطاق الرجولة ام ماذا ...؟؟


هذي النقطه توجه للنساء .. لاندري لماذ تفضله


يمكن تقدر تجاوب الي تفضل الاجنبي على السعودي


او يمكن مثل ماقال حمودي عشان تاخذ راحتها بالسوالف والقرقره



هو نفس السؤال للشباب

لماذا تخشى من ركوبك مع السعودي وتفضل الأجنبي ... ما المشكلة في السعودي اجيبوني ..؟؟


بالعكس الحين الوضع متغير كثيرررررر


الشباب السعوديين يفضلون الركوب مع سائق سعودي اكثر من الاجنبي


يمكن فيه من يفضل الاجنبي لكن قليل .


المشكله عندنا بالسعوديه هي من النساء .. لييه ؟؟ لاندري



الف الف شكر لك اهديته قلبي على الموضوع الرااائع


نااااايف
عرش المحبه
01 Sep 2005, 08:43 AM
بسم الله الرحمن الرحيم

اختي اهديته اشكرك على اختيارك للموضوع الرائع

وانا بعطيكم وجهة نظري وبصراحة

وربي اني افضل السعودي على الاجنبي بمليون مرة

اول شي يكفي انه من بلدي

وبعدين مثل ماقال الاخ نايف وربي اذا فيه شاب سعودي يسوي الحركة هذي

وربي انه حرام يحمل اسم سعودي وربي حرام

وربي لااركب مع سعودي بـ100 ريال ولاااركب مع اجنبي بـ 20 ريال

بعدين اكثر اللي يتخوفون من الركوب مع الشاب السعودي

هم الحريم بصرااحة

لكن انا اعرف اكثر من راعي تاكسي

وكم مرة سألتهم عن الحريم لاركبوا معهم لاان العالم ماخذين فكرة ان اي شاب سعودي معه تاكسي

يغازل الحريم اللي يركبون معه عشان كذا الحريم يخافون من السعوديين

وربي انه يحلف لي يقول اقسم بالله حنا اللي نلقى المضايقه من الحريم

يحلف لي يقول وربي اذا مو الحرمه تكلمت معك وقامت تسولف وربي ماتقدر تنطق ولابكلمه

يقول وربي ماتقدر تناظرهم يحلف يقول وربي اذا ركبوا معي حريم متحشمين ولبسهم لبس بنات عاقلات

يحلف يمين يقول وربي اني استحي اناظر في المراية عشان اشوف السيارات اللي وراي


لكن انا اقول وربي لو يطلعون البنات بلبس متحشمات وربي مايلقون مضايقات ابد

لاان الرجال يستحي يناظر في وحدة متحشمة

وربي مايقدر يحط عينه في عينها

الله يرزق كل راعين التكاسي كلهم ويصلح نياتهم ان شاء الله

والله يبعد خوف النساء من الشاب السعودي التاكسي لاان هو مااخذ تاكسي الا انه بحاجة الفلوس

الف شكر لك اختي اهديته قلبي على موضوعك الرائع

اتمنى تتقبلي ردي بصدر رحب

يعطيك الف عافيه اختي
مــــوجة حــزن
03 Sep 2005, 04:08 AM
اختي الغاليه اهديته قلبي

اشكركـ على موضوعكـ الاكثر من رائع

ثانيا


الحريم هم سبب كل شي

والا وشفيه السائق السعودي

بصراحه الواحد يفتخر انه راكب مع سائق سعودي

والا الاجنبي ماوراه الا البلاوي

وبصراحه البنت اذا ركبت مع الاجنبي تبي تسوي علاقه معاه

لانه متأكده انه ماراح يفضحها هذا من ناحيه

وياليت نرجع ثقتنا بالسائق السعودي

وجهة نظر وممكن تكون خاطئة



تقديري لكـ
أهديته قلبي
03 Sep 2005, 04:16 AM
ألف شكر لكم جميعاً على وجهات نظركم

ولكني لا اعتقد ان السوالف هي السبب الرئيسي

وكما أن ماقاله الاخ عرش من المضايقات على التكاسي من قبل الحريم فإن وجد قليل

أما بنسبة لما قاله الاخ موجه من أنها تركب مع الاجنبي لتقيم العلاقات فهذا كلام غير صحيح أبداً واتهام في غير محله وإن وجد قليل فلا تعم .

من اعماق القلب أشكركم جميعاً أخواني لردودكم ووجهات نظركم

ولكم تحيتي .
مــــوجة حــزن
03 Sep 2005, 04:26 AM
انا قلت مو كلهم

بعضهم

ونادر ماتحصلين الشي هذا

شاكر لكـ اختي

تقديري لكـ
أهديته قلبي
03 Sep 2005, 04:32 AM
اهلا خيوو

وان شاء الله ينعدم هالشي ولا نحصله

يسلموووو موجه
الصاااارووخ
04 Sep 2005, 11:45 AM
اهديته قلبي

كلامك في محله

علشاااانه سعودي يتغير كل شي

المفروض نشجعه

الف شكر لك على الموضوع الحساس


الصاااارووخ
أهديته قلبي
17 Jan 2006, 06:18 PM
أهلين بالكاابتن وسهلين

والمفروض أن يساعد الناس على تشجيعه

تسلم لردك خيوو

ولك التحية .